(ភ្នំពេញ)៖ ឯកឧត្ដម ឧត្តមសេនីយ៍ឯក ហួត ឈាងអន នាយរងសេនាធិការចម្រុះ នាយកទីចាត់ការចលនូប្បត្ថម្ភ អគ្គបញ្ជាការ នៅព្រឹកថ្ងៃទី៣ ខែមេសា ឆ្នាំ២០២៥ បានទទួលជួបលោកវរសេនីយ៍ឯក ជិន វ៉ន់តឹម នាយការិយាល័យអនុព័ន្ធយោធាវៀតណាមប្រចាំនៅកម្ពុជាចូលជួបជូនពរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ នៅទីចាត់ការចលនូប្បត្ថម្ភ អគ្គបញ្ជាការដ្ឋាន។
ក្នុងឱកាសនោះ ឯកឧត្តម ឧត្តមសេនីយ៍ឯក ហួត ឈាងអន បានថ្លែងអំណរគុណចំពោះលោកវរសេនីយ៍ឯក នាយការិយាល័យអនុព័ន្ធយោធាវៀតណាម ដែលបានមកជូនពរឆ្នាំថ្មីនាឱកាសនេះ ដោយបានចាត់ទុកថានេះបង្ហាញពីមនោសញ្ចេតនា ស្រឡាញ់រាប់អានគ្នា និងពង្រឹងនូវចំណងមិត្តភាព កិច្ចសហប្រតិបត្តិការក្នុងភាពជាអ្នកជិតខាងល្អ។
ឯកឧត្តម ឧត្តមសេនីយ៍ឯក នាយកទីចាត់ការចលនូប្បត្ថម្ភ ក៏បានថ្លែងអំណរគុណយ៉ាងជ្រាលជ្រៅចំពោះកងទ័ពវៀតណាមដែលតែងតែយកចិត្តទុក្ខដាក់ជួយកសាងអង្គភាពសាលាបើកបរ និងយន្តការីរបស់ទីចាត់ការចលនូប្បត្ថម្ភទាំងធនធានមនុស្ស និងហេដ្ឋារចនាសម្ព័ន្ធ។
ក្នុងកិច្ចឆ្លើយតប លោកវរសេនីយ៍ឯក ជិន វ៉ន់តឹម បានថ្លែងអំណរគុណចំពោះឯកឧត្តម ហួត ឈាងអន ដែលបានទទួលស្វាគមន៍យ៉ាងកក់ក្ដៅដល់ប្រតិភូអនុព័ន្ធយោធាវៀតណាម ដើម្បីចូលជួបជូនពរឆ្នាំថ្មី និងសូមជូនពរដល់ថ្នាក់ដឹកនាំ នាយទាហាន នាយទាហានរងទាំងអស់នៃទីចាត់ការចលនូប្បត្ថម្ភ ទទួលបានសុខភាពល្អបរិបូរណ៍ កម្លាំងខ្លាំងក្លា សុភមង្គល និងសម្រេចបានជោគជ័យក្នុងភារកិច្ចដែលថ្នាក់ដឹកនាំអគ្គបញ្ជាការ ក្រសួងការពារជាតិ និងរាជរដ្ឋាភិបាលប្រគល់ជូន៕
