(ភ្នំពេញ)៖ នាយឧត្តមសេនីយ៍ ម៉ក់ សារុន អគ្គមេបញ្ជាការរងនៃកងយោធពលខេមរភូមិន្ទ តំណាងដ៏ខ្ពង់ខ្ពស់នាយឧត្តមសេនីយ៍ វង្យ ពិសេន អគ្គមេបញ្ជាការ បានអញ្ជើញជាអធិបតីភាពក្នុងពិធីបូកសរុបលទ្ធផលផ្សព្វផ្សាយការងារអប់រំចិត្តសាស្ត្រឆ្នាំ២០២៤ និងទិសដៅអនុវត្តបន្តឆ្នាំ២០២៥ របស់ទីចាត់ការឃោសនា-ព័ត៌មាន កាលពីព្រឹកថ្ងៃទី២ ខែមេសា ឆ្នាំ២០២៥ នៅអគ្គបញ្ជាការដ្ឋាន។
ក្នុងរបាយការណ៍ស្វាគមន៍ បូកសរុបលទ្ធផលផ្សព្វផ្សាយការងារអប់រំចិត្តសាស្ត្រឆ្នាំ២០២៤ របស់ទីចាត់ការឃោសនា-ព័ត៌មានដែលបញ្ជាក់ដោយឯកឧត្តមឧត្តមសេនីយ៍ទោ ថោង សូលីម៉ូ បានឲ្យដឹងថា កន្លងមកទីចាត់ការឃោសនា-ព័ត៌មាន បានបំពេញការងារស្នូលសំខាន់ៗរបស់ខ្លួនយ៉ាងសកម្មរួមមាន ការងារអប់រំចិត្តសាស្ត្រ ការងារគោលនយោបាយ និងការងារព័ត៌មាន ដើម្បីលើកកម្ពស់ការងារនយោបាយអប់រំចិត្តសាស្ត្រ ការបណ្តុះនូវឆន្ទៈ មនសិការស្នេហាជាតិ ស្មោះត្រង់ចំពោះជាតិ គោរពវិន័យ គោរពបទបញ្ជា ច្បាប់លក្ខ័ន្តិកៈ អត្តចរិក សីលធម៌រស់នៅ និងការសាមគ្គីភាព ឯកភាពផ្ទៃក្នុងរឹងមាំ។
ក្នុងទិសដៅអនុវត្តបន្តឆ្នាំ២០២៥ ឯកឧត្តម ឧត្តមសេនីយ៍ឯក ខឹម សន នាយរងសេនាធិការចម្រុះ និងជានាយកទីចាត់ការឃោសនា-ព័ត៌មាន បានលើកឡើងអំពីសន្ទស្សន៍ផែនការអប់រំ គឺយោធិនម្នាក់ៗត្រូវទទួលការអប់រំតាមរូបភាពប្រមូលផ្តុំរៀនសូត្រជាលក្ខណៈរៀបរយឲ្យបាន២លើក ទទួលការផ្សព្វផ្សាយ៤លើកក្នុង១ឆ្នាំ និងអប់រំនៅនឹងកន្លែងត្រូវធ្វើជាប់ជាប្រចាំ ។
មានមតិបូកសរុបនិងផ្តាំផ្ញើនាឱកាសនោះនាយឧត្តមសេនីយ៍ ម៉ក់ សារុន បានកោតសសើរនិងវាយតំលៃខ្ពស់ចំពោះកិច្ចខិតខំប្រឹងប្រែងរបស់នាយទាហាន នាយទាហានរងនិងពលទាហានទាំងអស់របស់ទីចាត់ការឃោសនា-ព័ត៌មានដែលកន្លងមកសម្រេចបានលទ្ធផលគួរជាទីមោទនៈ ។ នាយឧត្តមសេនីយ៍បានគូសបញ្ជាក់ថា រាជរដ្ឋាភិបាលកម្ពុជាតាំងពីអាណត្តិមុនៗ ក៏ដូចជាអាណត្តិបច្ចុប្បន្ន ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានផ្ដោតការយកចិត្តទុកដាក់ជាសំខាន់ដល់ការកសាងកងយោធពលខេមរភូមិន្ទ ឱ្យក្លាយជាកងកម្លាំងប្រដាប់អាវុធដែលមានភក្តីភាពចំពោះជាតិ គោរពធម្មនុញ្ញ មានវិន័យសីលធម៌ស្អាតស្អំ សុភាពរាបសារ គោរពស្រឡាញ់ប្រជាពលរដ្ឋ និងមានសមត្ថភាពគ្រប់គ្រាន់ ដើម្បីបំពេញភារកិច្ចការពារឯករាជ្យ អធិបតេយ្យភាព បូរណភាពទឹកដី ព្រមទាំងថែរក្សាសន្តិភាព និងពង្រឹងស្ថេរភាព សន្តិសុខ សណ្តាប់ធ្នាប់សង្គម។
នាយឧត្តមសេនីយ៍បានបន្តថា ការផ្សព្វផ្សាយអប់រំចិត្តសាស្ត្រ ជាកិច្ចការមួយដ៏សំខាន់មិនអាចខ្វះបានក្នុងការធ្វើជាប្រទីបចង្អុលផ្លូវ ស្គាល់ច្បាស់អំពីល្បិចកលដ៏ខ្មៅកខ្វក់របស់ក្រុមជ្រុលនិយមមួយក្តាប់តូច ស្មោះត្រង់ដាច់ខាតចំពោះជាតិសាសនាព្រះមហាក្សត្រ និងស្មោះត្រង់ដាច់ខាតចំពោះរាជរដ្ឋាភិបាលស្របច្បាប់ ស្គាល់បូរណភាពទឹកដីនៃមាតុភូមិ ស្គាល់សមិទ្ធផលធំៗជាប្រវត្តិសាស្ត្ររបស់ជាតិ បំផុសនូវគំនិតស្នេហាជាតិនិងមានឆន្ទៈប្រយុទ្ធខ្ពស់។
នាយឧត្តមសេនីយ៍ បានផ្ដាំផ្ញើដល់យោធិនក្នុងអង្គពិធីទាំងមូល ត្រូវមានស្មារតីស្មោះត្រង់ចំពោះជាតិមាតុភូមិ លើកកម្ពស់មនសិការស្នេហាជាតិហ៊ានធ្វើពលិកម្មគ្រប់បែបយ៉ាងដើម្បីការពារបូរណភាពទឹកដី និងអធិបតេយ្យភាពនៃមាតុភូមិកម្ពុជា ។ គោរពយ៉ាងម៉ឺងម៉ាត់នូវរាល់បទបញ្ជា លក្ខន្តិកៈ បទវិន័យទូទៅរបស់កងយោធពលខេមរភូមិន្ទ និងច្បាប់នានារបស់រដ្ឋ ប្រឆាំងដាច់ខាតការប្រប្រាស់គ្រឿងញាណ ។
ត្រូវបន្តចូលរួមថែរក្សាសុខសន្តិភាពរបស់ប្រទេសជាតិប្រឆាំងដាច់ខាតបដិវត្តន៍ពណ៌ និងគាំទ្រការពាររាជរដ្ឋាភិបាលស្របច្បាប់ដែលមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាជាប្រមុខ ៕
